Satara,Maharashtra,India

सरपंच कलेक्टरशी भांडले, शिक्षक, विद्यार्थ्यांसाठी!

पोलिसांनी केली अटक, बीएलओ नियुक्तीवरून गदारोळ

छ.संभाजीनगर : निवडणूक आयोगाच्या कामासाठी शिक्षकांच्या करण्यात आलेल्या नियुक्त्यांवरून छत्रपती संभाजीनगर जिल्हाधिकारी कार्यालयात गदारोळ पाहायला मिळाला. शाळांमधील शिक्षकांना जर तुम्ही बीएलओ ड्युटी देणार असाल, तर वर्गात विद्यार्थ्यांना शिकवायचे कोणी?

असा संतप्त सवाल करत फुलंब्री तालुक्यातील गेवराई पायगा येथील सरपंच मंगेश साबळे यांनी जिल्हाधिकारी कार्यालयात धुमाकूळ घातला. यावेळी थेट जिल्हाधिकाऱ्यांनाच एकेरी भाषेत आव्हान देत आत्मदहनाचा इशारा देणाऱ्या सरपंच साबळे यांना पोलिसांनी तात्काळ ताब्यात घेऊन अटक केली आहे.

सध्या संपूर्ण जिल्ह्यात निवडणूक आयोगाच्या सूचनेनुसार मतदार याद्यांच्या पुनरीक्षणाचे काम सुरू आहे. या कामासाठी प्रशासनाने अनेक शाळांमधील ५० टक्क्यांहून अधिक शिक्षकांच्या ड्युटी लावल्या आहेत. यामुळे विद्यार्थ्यांचे मोठे शैक्षणिक नुकसान होत असल्याचा आरोप सरपंच मंगेश साबळे यांनी केला. शिक्षकांना या निवडणूक कामातून तातडीने वगळण्यात यावे आणि ही जबाबदारी इतर विभागांतील कर्मचाऱ्यांना देण्यात यावी, या मागणीसाठी त्यांनी जिल्हाधिकारी कार्यालय गाठले होते.

कार्यालयाच्या मुख्य प्रवेशद्वारावर पोहोचताच सरपंच साबळे यांनी थेट ठिय्या मांडला. पोलिसांनी त्यांना शांत राहून सनदशीर मार्गाने निवेदन देण्याची विनंती केली, मात्र त्यांनी पोलिसांचे ऐकले नाही. आमच्या मागण्या मान्य झाल्या नाहीत तर इथेच आत्मदहन करू, असा इशारा त्यांनी दिला. याच दरम्यान त्यांनी जिल्हाधिकारी विनय गौडा यांना एकेरी भाषेत उद्देशून त्यांना खाली बोलवा, अशी जोरदार घोषणाबाजी करत दालनाबाहेर आरडाओरड सुरू केली. या गोंधळामुळे संपूर्ण परिसरात नागरिकांची मोठी गर्दी जमली होती.

दरम्यान, या घटनेची माहिती मिळताच फुलंब्रीच्या तहसीलदार योगिता खटावकर या देखील तात्काळ जिल्हाधिकारी कार्यालयात पोहोचल्या. मात्र, आक्रमक झालेल्या सरपंचांनी त्यांनाही थेट जाब विचारण्यास सुरुवात केली. अखेर पोलिसांनी मध्यस्थी करत सरपंच साबळे यांना जिल्हाधिकाऱ्यांच्या दालनात नेले. मात्र, तिथे निवेदन सुपूर्द करतानाही त्यांनी जिल्हाधिकाऱ्यांशी अरेरावीची भाषा वापरल्याची माहिती सूत्रांनी दिली आहे.