Pune,Maharashtra,India

कार्यरत शिक्षकांना टीईटीत 15% गुणांची सवलत द्या

शिक्षक परिषदेचे राज्याध्यक्ष राजेश सुर्वे यांची मागणी

 पुणे : राज्यातील सेवाज्येष्ठ व कार्यरत शिक्षकांना शिक्षक पात्रता परीक्षा टीईटी, सीटीईटी उत्तीर्ण होण्यासाठी गुणांमध्ये सवलत द्यावी, अशी मागणी महाराष्ट्र राज्य शिक्षक परिषद (प्राथमिक विभाग) यांच्या वतीने करण्यात आली आहे. शिक्षक परिषदेचे राज्याध्यक्ष राजेश सुर्वे व पश्चिम महाराष्ट्र अध्यक्ष शशिकांत पाटील यांच्या नेतृत्वाखाली महाराष्ट्र राज्य परीक्षा परिषद, पुणे अध्यक्ष नंदकुमार बेडसे यांची भेट घेऊन याबाबत निवेदन देण्यात आले.

   सर्वोच्च न्यायालयाच्या निर्णयानुसार प्राथमिक व माध्यमिक शिक्षकांना दोन वर्षांच्या आत शिक्षक पात्रता परीक्षा उत्तीर्ण होणे बंधनकारक करण्यात आले आहे. त्यानंतर शालेय शिक्षण विभागाने शिक्षक संवर्गातून पदोन्नतीने पदे भरण्याच्या प्रक्रियेतही टीईटी/सीटीईटी परीक्षा उत्तीर्ण असणे अनिवार्य केले आहे.

   राज्यातील पहिली ते आठवीपर्यंत अध्यापन करणाऱ्या शासकीय व निमशासकीय शिक्षकांना टीईटी/सीटीईटी परीक्षा दोन वर्षांत उत्तीर्ण करणे आवश्यक आहे. तसेच मुख्याध्यापक, केंद्रप्रमुख, केंद्र समन्वयक, विस्तार अधिकारी व विषय शिक्षक पदांवरील पदोन्नतीसाठीही ही अट लागू करण्यात आली आहे.

   सध्या अनुसूचित जाती- जमाती, विमुक्त व भटक्या जमाती, इतर मागासवर्गीय व दिव्यांग प्रवर्गांसाठी उत्तीर्णतेसाठी ५ टक्के गुणांची सवलत देण्यात येते (किमान ५५% गुण आवश्यक). तर माजी सैनिक, शहीद सैनिकांच्या पत्नी व कुटुंबीयांसाठी १५ टक्के सवलत देऊन किमान ४५% गुणांची अट ठेवण्यात आली आहे.

   याच धर्तीवर स्थानिक स्वराज्य संस्था व खाजगी शिक्षण संस्थांमध्ये १५ वर्षे किंवा त्यापेक्षा अधिक सेवा पूर्ण केलेल्या सेवाजेष्ठ शिक्षकांना त्यांच्या वयाचा, मानसिकतेचा व अभ्यासक्रमातील बदलांचा विचार करून १५ टक्के गुणांची सवलत देण्यात यावी, म्हणजेच टीईटी/सीटीईटी परीक्षा उत्तीर्ण होण्यासाठी किमान ४५ टक्के गुणांची अट ठेवण्यात यावी, अशी मागणी शिक्षक परिषदेकडून करण्यात आली आहे.

   या संदर्भात महाराष्ट्र राज्य परीक्षा परिषद अध्यक्ष नंदकुमार बेडसे यांच्यासोबत सविस्तर चर्चा झाली असून, याबाबत सकारात्मक भूमिका घेत उचित कार्यवाही केली जाईल, असे आश्वासन देण्यात आल्याची माहिती पश्चिम महाराष्ट्र अध्यक्ष शशिकांत पाटील यांनी दिली.

   या शिष्टमंडळात महाराष्ट्र राज्य पदवीधर शिक्षक संघटनेचे राज्याध्यक्ष मनोज मराठे, अलिबाग शिक्षक पतपेढीचे विद्यमान चेअरमन निलेश साळवी, शिक्षक परिषदेचे मुरुड तालुका उपाध्यक्ष हेमकांत गोयजी यांच्यासह अनेक पदाधिकारी उपस्थित होते.