Satara,Maharashtra,India

बीएलओ ड्युटीवरील शिक्षकाला मारहाण

लातूर : शासकीय कर्तव्य बजावत असलेल्या शिक्षकांवरील हल्ल्यांचे सत्र थांबण्याचे नाव घेत नसल्याने शिक्षकांच्या सुरक्षिततेचा प्रश्न पुन्हा एकदा ऐरणीवर आला आहे. लातूर जिल्ह्यातील हासेगावचे बीएलओ तथा कास्ट्राईब शिक्षक संघटनेचे जिल्हाध्यक्ष सुभाष मस्के यांच्यावर एसआयआरचे काम करत असताना एका व्यक्तीने मारहाण केल्याची धक्कादायक घटना घडली आहे.

घटनेनंतर सुभाष मस्के हे गुन्हा दाखल करण्यासाठी औसा पोलीस ठाण्यात दाखल झाले असून, शिक्षक चळवळीतील पदाधिकारी व शिक्षक बांधवांनी मोठ्या संख्येने पोलीस ठाण्यात उपस्थित राहून त्यांना पाठिंबा द्यावा, असे आवाहन करण्यात आले आहे.

अलीकडच्या काळात शिक्षकांवर जनगणना, बीएलओ, मतदार यादी पुनरिक्षण (SIR) यांसारख्या अशैक्षणिक कामांचा वाढता बोजा टाकला जात आहे. नियमित अध्यापन, प्रशासकीय जबाबदाऱ्या आणि विविध शासकीय मोहिमा यामध्ये व्यस्त असतानाच ही अतिरिक्त कामे करावी लागत आहेत. अशा परिस्थितीत कर्तव्य बजावताना शिक्षकांवर होणारे हल्ले त्यांच्या सुरक्षिततेबाबत गंभीर प्रश्न निर्माण करत आहेत.

जनगणनेचे काम करणाऱ्या शिक्षकाला मारहाण करण्याची घटना लोणंद येथे घडली होती.

साताऱ्यातील लोणंद येथील घटनेनंतरही शासनाने ठोस उपाययोजना न केल्याने शिक्षकांमध्ये तीव्र नाराजी आहे. आता लातूरमधील घटनेमुळे राज्यभरातील शिक्षक संघटनांनी संताप व्यक्त करत, शासकीय कामावर असलेल्या शिक्षकांना कायदेशीर संरक्षण, सुरक्षा व्यवस्था आणि हल्लेखोरांवर तातडीने कठोर कारवाई करण्याची मागणी केली आहे.

वारंवार घडणाऱ्या अशा घटनांमुळे शिक्षकांमध्ये भीतीचे वातावरण निर्माण झाले असून, शासकीय कर्तव्य बजावताना शिक्षकांच्या सुरक्षिततेची संपूर्ण जबाबदारी शासनाने स्वीकारावी, अशी मागणी राज्यभरातून जोर धरत आहे.