Satara,Maharashtra,India

महाराष्ट्रातील ५ विधानपरिषद निवडणुकांचं बिगुल वाजलं.

शिक्षक- पदवीधरसाठी 23 ऑक्टोबरला मतदान 27 ऑक्टोबरला मतमोजणी

नवी दिल्ली : केंद्रीय निवडणूक आयोगाकडून आज शिक्षक आणि पदवीधर मतदारसंघांच्या निवडणुकांची घोषणा करण्यात आली. अमरावती, पुणे, नागपूर, छ. संभाजीनगर या ठिकाणी निवडणुका होणार आहेत. शिक्षक आणि पदवीधर निवडणुकांसाठी २३ ऑक्टोबर रोजी मतदान प्रक्रिया पार पडणार आहे. २७ तारखेला मतमोजणी होणार आहे. निवडणुकांची घोषणा करण्यात आल्याने आता सर्वच राजकीय पक्ष तयारीला लागतील.

शिक्षक आणि पदवीधर निवडणुकांसाठी २९ सप्टेंबरपासून उमेदवारी अर्ज दाखल करण्यास सुरूवात होणार आहे. ६ ऑक्टोबर अर्ज दाखल करण्याची शेवटची तारीख आहे. या निवडणुका महायुतीत होणार की स्वतंत्र लढवण्यात येणार हे पाहणं महत्वाचे राहिल. कारण महायुतीमधील घटक पक्षाने स्वतंत्र निवडणूक लढवण्याची देखील इच्छा व्यक्त केली आहे. या निवडणुकांच्या घोषणांमुळे आता सर्वच राजकीय पक्ष कामाला लागले आहेत.

राज्यातील ५ शिक्षक-पदवीधर मतदारसंघातील आमदारांचा कार्यकाल ६ डिसेंबर रोजी संपत आहे. यामध्ये औरंगाबाद विभाग पदवीधर मतदारसंघाचे आमदार चव्हाण सतीश भानुदासराव, पुणे विभाग पदवीधर मतदारसंघाचे आमदार अरुण गणपती लाड, नागपूर विभाग पदवीधर मतदारसंघाचे आमदार अभिजीत गोविंदराव वंजारी, अमरावती विभाग शिक्षक मतदारसंघाचे आमदार सरनाईक किरण रामराव आणि पुणे विभाग शिक्षक मतदारसंघाचे आमदार जयंत दिनकर आसगावकर याचा कार्यकाळ लवकरच संपणार आहे. त्यामुळे या पाचही जागांवर निवडणुका होणार आहेत.

दरम्यान, अमरावती शिक्षक मतदार संघात भाजपकडून श्री शिवाजी शिक्षण संस्थेचे संचालक हेमंत काळमेघ, खासदार अनिल बोंडे यांच्या भगिनी संगीता शिंदे आणि शेखर भोयर यांची नावं चर्चेत आहेत. तर काँग्रेसकडून राष्ट्रवादी काँग्रेसचे माजी मंत्री हर्षवर्धन देशमुख यांची कन्या आदिती पोहरे यांचं नाव चर्चेत आहे.