Satara,Maharashtra,India

गॅस पायी शिक्षक 'गॅस' वर

सातारा : एकीकडे शिक्षणाचे धडे गिरवायचे की गॅस एजन्सीचे उंबरठे झिजवायचे? असा संतप्त सवाल आता शिक्षक विचारू लागले आहेत. एप्रिलच्या रखरखत्या उन्हात शाळा सकाळच्या झाल्या असल्या, तरी शिक्षकांचा दुपारचा वेळ मात्र गॅस सिलेंडर मिळवण्यासाठी एजन्सीच्या रांगेत आणि 'ऑनलाईन'च्या चक्रव्यूहात जात आहे. प्रशासनाच्या निकामी ऑनलाईन यंत्रणेमुळे वैतागलेल्या एका शिक्षकाने तर "साहेब, काडी लावा त्या सिलेंडरला!" अशा शब्दात आपला संताप व्यक्त केला आहे.

गेल्या आठवडाभरापासून अनेक शिक्षक गॅस मिळवण्यासाठी धडपडत आहेत. पण एजन्सीने मांडलेला 'ऑनलाईन' चा खेळ संपता संपत नाहीये. पहिल्या दिवशी मोबाईल लिंक करा, दुसऱ्या दिवशी २४ तास थांबा, तिसऱ्या दिवशी ओटीपीची वाट पहा आणि चौथ्या दिवशी मुख्याध्यापकांचे पत्र आणा... अशा एकामागून एक अटींच्या जाळ्यात शिक्षकांना अडकवण्यात आले आहे. ही गॅस एजन्सी आहे की कागदपत्रे तपासणीचे एखादे शासकीय कार्यालय, असा प्रश्न आता उपस्थित होत आहे.

एजन्सीच्या नवीन पोर्टलचा गोंधळ इतका आहे की, सात-सात दिवस होऊनही 'लिमिट सेट नाही' किंवा 'ओटीपी येत नाही' हीच उत्तरे मिळत आहेत. त्यात भर म्हणून एजन्सीतील कर्मचारी फोन उचलत नाहीत आणि विचारणा केली तर "आम्ही फोन घेऊन वैतागलोय" अशी उद्धट उत्तरे दिली जात आहेत. मुळात ही ऑनलाईन सक्ती सर्वसामान्य नागरिकांच्या आणि शिक्षकांच्या सोयीसाठी आहे की त्यांना छळण्यासाठी? याचा जाब आता विचारला जात आहे.

सिलेंडर शिक्षणाचा लोच्या केला 

या गोंधळाचा परिणाम केवळ शैक्षणिक कामावरच होत नाही, तर शिक्षकांच्या कौटुंबिक शांततेवरही झाला आहे. शाळेची वेळ संपल्यानंतर रोज दोन-दोन तास एजन्सीत घालवावे लागत असल्याने "शाळा सुटल्यावर नक्की कुठे जाता?" असा संशयी प्रश्न घरच्यांकडून विचारला जात आहे. एकीकडे जनगणना, निकाल पत्रके आणि शैक्षणिक कामांचा डोंगर समोर असताना, गॅससाठी होणारी ही फरफट शिक्षकांच्या संयमाचा अंत पाहत आहे.

गॅससाठी खेळ मांडीयला 

ऑनलाईन प्रक्रियेतील त्रुटींमुळे जर एखाद्या सुशिक्षित वर्गाची ही अवस्था होत असेल, तर ग्रामीण भागातील सर्वसामान्यांचे काय,  असा सवाल नागरिक करत आहेत. संबंधित विभागाने या तांत्रिक अडचणींची तातडीने दखल घेऊन हा गुरुजी आणि वितरकांचा 'गॅससाठी खेळ' थांबवावा, अन्यथा शिक्षकां बरोबर पालक ही रस्त्यावर उतरल्याशिवाय राहणार नाही.